Spói lengra en nefið nær

Spóinn er einn einkennisfugla í umhverfi okkar. Það er einkum tvennt sem vekur athygli leikmanns á þessum sérstæða fugli. Dillandi söngur hans ómar alls staðar þar sem fuglinn ber niður bæði í lofti og á jörðu. Á varptíma gerir hann engan mun dags og nætur.  Enginn íslenskur fugl,fyrir utan kríuna, á lengri farleið en spóinn. Vitað er að spóar frá Íslandi fara allt niður undir miðbaug og flestir eyða vetrinum í Vestur-Afríku. Merkilegt við ferðir þeirra er að foreldrarnir fara á undan ungunum, en þeir rata á áfangastað, sem er um 7000 km. leið.