English

Hátíðin

Skjaldborg - hátíð íslenskra heimildamynda er haldin um hvítasunnuhelgina ár hvert. Hátíðin var stofnuð árið 2007 og hefur síðan þá verið eini sérhæfði vettvangurinn fyrir frumsýningu íslenskra heimildamynda hér á landi. Fagið og hátíðin hafa vaxað og dafnað hönd í hönd og er óhætt að segja að Skjaldborgarbíó og Patreksfjörður séu orðin að heimili íslenskra heimildamynda. Umhverfið, gestirnir og heimamenn hafa í gegnum árin skapað aðstæður sem mynda einstakt andrúmsloft og samveru. Hátíðin leiðir saman reynslubolta í faginu, byrjendur og hinn almenna áhorfanda en þannig stuðlar hún að skemmtilegu og skapandi samtali sem gegnir mikilvægu hlutverki fyrir þróun og miðlun íslenskrar heimildamyndagerðar.

Auk þess að frumsýna íslenskar myndir sinnir hátíðin heimildamyndagerð á heimsvísu. Frá upphafi hefur mikið púður verið lagt í að fá á hátíðina erlenda heiðursgesti sem eru stór og mikilvæg nöfn í heimildamyndagerð á alþjóðavísu. Verk heiðursgesta eru sýnd utan keppnisdagskrár og haldin er masterclass með viðkomandi höfundi. Á þennan hátt dýpkar hátíðin enn frekar hlutverk sitt sem þróunarvettvangur fyrir verkefni, leiktjóra og áhugafólk um heimildamyndir á Íslandi. Á dagskrá eru einnig fjölmargir aðrir dagskrárliðir t.d. verk í vinnslu, matarveislur, ball og annað skemmtanahald alla daga hátíðarinnar.

Þær íslensku heimildamyndir sem sýndar eru á hátíðinni keppa um tvenn verðlaun; áhorfendaverðlaunin Einarinn, sem hafa verið veitt frá upphafi, og dómnefndarverðlaunin Ljóskastarann, sem kynnt voru til leiks árið 2017. Það þykir orðinn gæðastimpill að komast inn á hátíðna en verðlaunamyndir hátíðarinnar hafa oftar en ekki verið tilnefndar til Edduverðlaunanna í kjölfarið og margar unnið til alþjóðlegra kvikmyndaverðlauna.

Upphafið

Leikmyndahönnuðurinn Hálfdán Pedersen kom óvænt til Patreksfjarðar árið 2006. Á rölti sínu um bæinn rambaði hann inn í Skjaldborgarbíó og uppgötvaði þá bíósalinn fagra og hið einstaka starf sem Lionsmenn höfðu unnið til að reka og viðhalda bíóinu. Hálfdán fór aftur heim en bíóið sat áfram í huga hans. Nokkru síðar átti hann spjall við félaga sinn, handritshöfundinn og rithöfundinn Huldar Breiðfjörð og í sameiningu ákváðu þeir að koma á fót sérhæfðri íslenskri heimildamyndahátíð sem haldin yrði í Skjaldborgarbíói enda var á þeim tíma enginn slíkur vettvangur var til staðar á Íslandi. Komið var á fót skipulagsnefnd með heimamönnum og bransafólki að sunnan og fyrsta hátíðin haldin um hvítasunnuhelgina 2007. Hátíðin hefur allar götur síðan verið árlegur fögnuður íslenskrar heimildamyndagerðar með sérstaka áherslu á metnaðarfulla dagskrá og skemmtilegt andrúmsloft.

Contact

skjaldborg@skjaldborg.is

+354 820 3646

Eagle AirSóknaráætlun VesturlandsKvikmyndamiðstöð ÍslandsVesturbyggðOrkubúa Vestfjarða

Contact

skjaldborg@skjaldborg.is

+354 820 3646

Eagle AirSóknaráætlun VesturlandsKvikmyndamiðstöð ÍslandsVesturbyggðOrkubúa Vestfjarða